تســــــــــــــاؤلات ياســــــــــــادة

إذا كان رب البيت بالدف طالعٌ ..... فشيمة أهل البيت كلهم راقصون

عبارة أرددها كلما لا أستطيع متابعة أو فهم أو عدم الرد على شىء ما

ففى ظل نظام سياسى حكومى حاكم ومش حاكم فاسد وفاشل وغبى ومتعجرف وحمار يتصف بالتخاذل والعمالة والخيانة والغش والسرقة والتدنيس والتدليس ويعشق الذل والمهانة وعبارت الشجب والتنديد ولا يستطيع عمل شىء إلا الكلام وحتى الكلام نفسه لا يكون مقنع بأى حال من الأحوال هذا وماخفى كان أعظم .

وفى ظل آلة إعلام مأمورة ومأجورة إلا ما رحم ربى سواء إن كانت مقروءة أو مسموعة أو مرئية .آلة إعلام منتاش فاهم منها اى حاجة فى أى حتة ولا عارف مين صح ولا مين إللى غلط ولا عارف مين بتاع ربنا ومين بتاع الحكومة ومين بتاع الشعب ومين بتاع إسرائيل ومين بتاع أمريكا ومين بتاع البتاع بتاع البتاع بتوع البتوع إللى عملوا كل البتاتيع إللى أنا وإنت مش فاهمين منها أى بتاع

الواحد والله مبقاش عارف يصدق إيه ولا يآمن بإيه

طبعا

لا إله إلا الله .. سيدنا محمد رسول الله بها نحيا وبها نموت وبها نلقى الله – اللهم ثبتنا على دينك .... ده شىء مفروغ منه . بس إللى أقصده

إن أنا وإنت مبقناش فاهمين ..أمريكا دى دولة حلوة ولا كخة وأوباما ده راجل جدع ولا بيحور علينا وحماس دى فعلا عايزة تحرر القدس ولا ماشية بدماغ ناس تانية وعايزة تزود البلة طين وقناة الجزيرة دى قناة بنت حلال يعنى ولا زى ما بيقول النظام عندنا دى بتسوء سمعة مصر ومصر دى أمى ولا يغلط فى أمى شوف بقى الواحد ممكن يعمل فيه إيه ...وجماعة الإخوان المسلمين دول جماعة محظورة ولا ناس شرفاء ولا بيتعاونوا مع الحكومة من تحت لتحت وفى بين قيادتهم وبين الحكومة خطط عمل ومشاريع وحوارت إحنا وإللى بيتبعوا نهج الإخوان من الطلبة والشباب منعرفش حاجة عنها ومتعرفش كمان مصر فى سياستها تجاه فلسطين عندها حق وتحيا مصر وطظ فى فلسطين ولا لأ تحيا الوحدة العربية والقدس إسلامية ولا صوت يعلو فوق صوت المعركة ...ولا إيران – إيراااااان – إيران دى بقى عايزة شغل بعد الظهر الواحد بقى محتار مش عارف هما مسلمين ولا كفرة وولاد ستين فى تلاتين ... واحد زى الشيخ القرضاوى معترف بيهم والشاعر عبد الرحمن يوسف إبنه بيقول فى حسن نصرالله شعر وناس تقولك أصل صلاح الدين الأيوبى كان شيعى وناس تانيين خالص يطلعوا يقولوا لأ دول كفرة وصلاح الدين الأيوبى مالوش دعوة بيهم دول تطاولو على الصحابة ..ومنتاش عارف جمال مبارك هيترشح للإنتخابات ولا لأ ومين أحمد عز ده وعايز مننا إيه ومبارك هيكمل معانا ويفضل قاطع نفس إللى خلفونا وفاقع مرارتنا ولا ناوى يورينا جمال خطوته وحلو كده بارك الله فى ما رزق ...والبرادعى ده راجل تمام ولا زى إخواته والله هو بيقول كلام زى الفل بس فى عهده كرئيس لهيئة الطاقة الأمريكان دخلو العراق وشكلهم مش خارجين منها تانى ...وعمر البشير ده راجل حلو ولا إبن تييييييت زى بقية الرؤساء العرب أدام الله عزهم وأطال الله فى بقائهم وربنا اعلم بإللى فى النية والزعيم القذافى ده ملك ملوك إفريقيا بمناسبة إيه إن شاء الله وجمال عبد الناصر ده رجل تمام ورجل الأمة العربية الأول ولما هو كده عمل إيه مع حسن البنا وسيد قطب ونكسة 67 دى حصلت إزاااااى والسادات ده رجل الحرب والسلام ولا بايع ناسه وراجل حشاش وكييف وتطبيعى كبير والناس العمال المصريين إللى بيعملوا إضرابات كل يوم متضررين انا عارف إنهم متضررين ومحدش يقدر يخرج المصرى من بيته إلا لما يقول جااااااااى ويكون خلاص فاض بيه بس الجرايد الوحشة بتقول عليهم على لسان نواب الشعب إنهم قابضين من بره طب فين ونبى القبض إللى قبضوه ده ...وإللى حصل بينا وبين الجزائر ده هيـــــــــه ده حاجة تحير هما فعلا وحشيـــــــن ولا العيب فينا ولا هى فتنة وإتزرعت ولازم ناخد بالنا منها وهل فعلا هناك ما يسمى بالإعلام الأحمر والإعلام الأبيض والقنوات إللى عمالة تضارب فى بعضيتها دى والبرامج ومين الصح ومين الغلط فى قضية مرتضى منصور وأحمد شوبير وبرنامج البيت بيتك إللى بقى إسمه مصر النهاردة هو بيتنا فعلا وبيوصل صوتنا للمسؤلين ولا خلاص بقى برنامج النظام الأول إللى من خلاله بيوصل سمومه للشعب وهشام طلعت ده حرض فعلا على قتل سوزان تميم ولا لأ ده راجل كوبارة وتمام وغيره وغيره وغيره وغيره قضايا كتير وإحنا عايشين ولا فاهمين

تقرا فى جرايد المعارضة تشوف غيره تماما فى جرايد إخوانا البعدا تسمع غيره تماما على لسان نواب الشعب تشاهد نقيض كل ذلك فى البرامج الإخبارية المختلفة والواحد مبقاش

فاااااااااهم حااااااااااجة خااااااااااالص

وأى حاجة بقت تقولها الحكومة الإنطباع رقم واحد إللى بيوصلك إنهم كدابين حتى لو كانوا صادقين لإنه خلاص مبقاش فى ثقة كله غش وكدب وعدم أمانة لا فى كتابة ولا نشر ولا بث وكله بقى بيعمل لحساب نفسه تحت إسم حرية رأى وحرية تعبير وحرية فكر الواحد والله بقى خايف فى يوم من الأيام يشك فى أهله

بالله عليكم لو فى أى حد فاهم أى حاجة فى اى حاجة يفهمنى

هياخد ثواب والله

أنا برضو أخوكم ومشغول ومش فاضى أشوف كل ده بنفسى والحمد لله أوى إن الواحد عارف هو مين وإبن مين وأشهد ألا إله إلا الله وأن سيدنا محمد رسول الله وكفى بها من نعمة

المنســـــ19ــــ4ـــــ2010ـــــى